ટીકરમા બાઈક ચલાવવા બાબતે થયેલી માથાકુટમાં ફરીયાદ દાખલ
હળવદના ટીકર ગામે બાઈક લઈને નીકળવા બાબતે માથાકુટમાં આરોપીઓએ કર્યો છરી અને લાકડીથી હુમલો કર્યાની હળવદ પોલીસ મથકે ફરીયાદ નોંધાઈ છે.
મળતી માહિતી મુજબ હળવદ તાલુકાના ટીકર ગામે રહેતા અકબરભાઈ ઉર્ફે હકાભાઈ ભટ્ટીએ આરોપી લાલમામદભાઈ કાસમભાઈ રાજા, રમજાનભાઈ કાસમભાઈ રાજા, રમજાનભાઈ દાદમહમદભાઈ તથા મુસ્તાકભાઈ લાલમામદભાઈ રાજા રહે. બધા ટીકર ગામવાળા વિરુદ્ધ હળવદ પોલીસ સ્ટેશનમાં ફરીયાદ નોંધાવતા જણાવ્યું હતું કે ફરીયાદીના ઘર પાસે પાણીની લાઇન ખોદેલ હોય ત્યાથી આરોપી લાલમામદભાઈના દિકરા મોટરસાયકલ લઇને નીકળતા સાહેદ રૂકશાનાબેને તેઓને અહિયાથી મોટરસાયકલ નહીં ચલાવવાનુ કહેતા આરોપીઓને સારૂ નહીં લાગતા સાહેદ સાથે બોલાચાલી કરી હતી જે બાબતે ફરીયાદી તથા તેના ભાઇ સાહેદ જુસબભાઇ તથા હબીબભાઇ તથા ફરીયાદીના દિકરા રમજાનભાઇ તથા શબીરભાઇ આરોપીઓને સમજાવવા જતા આરોપીઓને સારૂ નહીં લાગતા ફરીયાદી તથા સાહેદોને ભુંડી ગાળો બોલી ઉશ્કેરાઇ જઇ ઢીકાપાટુનો માર મારી છરી વડે હુમલો કરી તથા લાકડી વડે મારમારી જાનથી મારી નાંખવાની ધમકી આપી હોવાની ફરીયાદ નોંધાવતા પોલીસે ફરીયાદના આધારે ગુન્હો નોંધી આગળની ધોરણસરની કાર્યવાહી હાથ ધરી છે.
